共識 Consent

全力支持 SUPPORTED BY:

“累積學習”計劃

Accumulator Scheme

合作伙伴 Partners:

seshglobal.org

訂閱每月消息!

© 2020 Sticky Rice Love 糖不甩
此網誌及相關超連結內的內容純屬普遍意見,若就身體上的任何問題,敬請就個別意見,諮詢閣下的醫生。

The advice given in this platform and the related hyperlink is of a general nature only.  For specific advice on the medical conditions, please consult your medical doctor.

  • 糖不甩 Sticky Rice Love

共識 Consent

《Stickypedia系列-安全性行為:第四寶》激長篇!


登登登登!講到安全性行為之中,最神秘嘅嘢,就係Consent-共識啦!點解係最神秘?因為佢似是疑非,好多時男男女女都會懷疑consent究竟存唔存在...



要達成共識有5個基本原則,缺一不可:

1。雙方意見必須一致

如果二人嘅意願唔一樣,咁就係「無達成到共識」。雙方都應該暫停,直至大家都完全同意之後要繼續嘅行為。

2。大家都係清醒,安全,自願嘅狀態

3。明確,清晰咁表達

4。過程中可以隨時撤銷,或者提出改變(繼而再達成共識)

5。身處任何關係都唔可以假設對方一定會滿足或配合自己



《ONLY YES MEANS YES!》

以下就有5個常見情景,到底佢哋係咪有共識嘅表現呢?




1. 一對情侶行街行到好攰又無咩嘢做,上網見到宜家啲酒店好平,A就建議去開房睇戲。B睇睇下戲就開始摸同錫A,最後發生咗性行為。但其實A由頭到尾無話「唔想」,亦無話「想」。



⛔既然無明確地表達「想」定「唔想」,即係無共識!無反抗唔代表係同意,無講「唔好」唔代表係同意,同你去開房亦唔代表同意發生性行為。

✅其實開房都唔一定係為咗發生性行為,香港寸金尺土,好多人都希望有一個同伴侶獨處嘅空間,單純地睇下戲,陪伴下對方。




2. 2個人一齊去飲酒,有一方飲得好醉,另外一個人提議要發生性行為,飲醉咗個個就笑著咁答「哈哈...好...哈哈...」。



⛔雖然佢話咗好,但係唔完全清醒之下佢係咪可以好好咁為自己做決定呢?就好似飲醉酒嘅人叫你幫佢紋身,你會唔會幫佢紋?

✅《When Yes means No》發唔發生性行為都係一個影響一生、無得返轉頭嘅決定,所以一定要係神智精醒嘅情況下嘅「同意」先算數。




3. 一對情侶一直都有發生性行為,有一日其中一個想做,但另一方其實覺得好攰唔係好想,講咗幾次「唔好啦...」,但最後半推半就之後都發生咗性行為。



⛔半推半就、無反抗唔代表同意!咁樣亦係無共識之下發生嘅性行為!好多時係一段關係入面,好容易會覺得無需要再為親密行為而詢問對方嘅意願。

✅即使之前發生過性行為,每一次嘅性行為都需要一個新嘅consent新嘅共識。唔好假設對方有必要/一定會同你發生性行為。




4. 一對網友係網上約炮,已經傾好咗要見面發生性行為,亦討論埋要用咩安全措施。出到嚟係發生性行為途中,有一方突然想停。佢話「停一停先,我唔係好舒服」,大家就咁暫停左,無再繼續落去。事後佢哋再討論想暫停嘅原因,好好溝通。



✅佢哋有consent地開始性行為,亦係有consent之下停止性行為。

無論關係係網友、情侶定係夫妻,係性行為途中,任何一方都可以隨時隨地拒絕繼續性行為!




5.

A:「你今日好靚。」(一路講一路撫摸對方)

B:「唔好啦!我唔想搞啊!」

A:「你唔係好愛我伽咩?我等咗好耐。」

B: 「我唔想啊!」

A:「我愛你先想搞你,你唔想即係唔愛我!」

B:「好啦...」



⛔係強迫同威脅之下嘅Yes並唔係真心嘅Yes! 

✅以愛之名去強迫另一半發生性行為更加唔係愛嘅表現,只係代表你想滿足自己嘅性慾,亦唔重視依段關係同對方。



⚠️無consent嘅性行為有幾唔安全?⚠️

首先,其中一方會受傷害,可能係無身體傷痕,但心裡都會唔好受。

然後,大家嘅關係可能會受影響,可能會鬧交,可能會疏遠對方。

最後,係無得到他人同意嘅情況下發生性行為,對方係可以從法律途徑追究,視乎係咩行為而控告強姦/猥褻侵犯/非法肛交。



如果有consent,就無人會係唔情願嘅情況下發生性行為。

如果有consent,大家都好清楚,好有信心,大家係樂意發生親密行為,唔會後悔。

Consent係... 有問有答,最好係言語上都有講「好呀」或者「我想」。

Consent係... 誠實嘅溝通,雙方嘅地位同權力係一樣,無人被迫。



Consent同共識好似好容易做到,但實際又好難捉摸。其實簡單啲咁諗,嘗試將性行為換成為斟茶俾對方飲...🍵

你會唔會係對方無講過自己想飲茶就強迫對方要飲你斟嘅茶,否則就話佢係唔愛你嘅象徵?💭

你會唔會係對方神智唔清醒嘅時候餵對方飲茶?💭

你會唔會因為對方上星期飲過你沖嘅茶,所以你今日就突然喺佢門口出現要求佢飲你嘅茶?💭



如果以上嘅答案都係「唔會」「梗係唔會啦傻嫁咩」,咁相信係去到性嘅層面你都會理解共識嘅重要性。

(有興趣嘅朋友仔可以睇下tea consent嘅片,傳送門:https://www.youtube.com/watch?v=oQbei5JGiT8 )



ONLY YES MEANS YES!

緊記Consent 5大原則,係任何時候都要達成共識!



#consentiseverything

#stickypedia #stickyricelove #糖不甩 #stickypediasafersex #stickypedia安全性行為 #共識 #consent

#五大寶品 #缺一不可 

#sexeducationhk #性 #性教育 #gender #relationships #sex #hksex #hklove #hkboys #hkgirls