• 糖不甩 Sticky Rice Love

功能知多少

《Stickypedia系列-性玩具:五大需知小知識(2)》



之前返情趣用品店嘅時候,好多客人上到嚟都對於自己想買啲咩功能嘅性玩具毫無頭緒,咁我除咗同佢哋介紹唔同性玩具嘅功能之外,好多時都會建議佢哋喺自慰嘅時候了解下自己嘅性器官對於唔同嘅刺激有咩感覺,例如鍾意刺激陰蒂定陰道多啲,或者男士自慰嘅時候點樣刺激陰莖會舒服啲咁,再根據佢哋嘅喜好去挑選性玩具。今次我就會為大家介紹性玩具比較常見嘅4種功能:



1️⃣ 震動及按摩

有唔少玩具同時具備震動同按摩 (上下或打圈按壓) 功能,所以我就將佢哋合併一齊介紹啦~ 震動及按摩功能嘅性玩具種類好廣泛,可以刺激性器官嘅唔同部分,包括陰蒂、陰道、陰莖、前列腺等等,亦都有用於刺激後庭嘅震動器。現時好多性玩具都可以調較震動速度同頻率以及按摩嘅力度,亦都有唔少「雙重享受」嘅按摩器,例如可以同時刺激陰蒂同陰道,或者同時刺激前列腺同會陰。咁唔知大家知唔知道男性前列腺同會陰係喺邊度嘅呢?其實前列腺係位於距離男性肛門5至7厘米嘅位置,喺膀胱下方,大約好似一粒栗子咁大,可以透過按壓達到高潮,不過因為後庭缺少分泌,所以使用按摩前列腺嘅性玩具嗰陣建議一定要配合潤滑劑,咁就可以避免因為磨擦而造成嘅疼痛同損傷💦;而會陰就係喺睪丸同肛門之間嘅敏感位置,同樣可以透過震動同按摩帶黎快感。




2️⃣ 衝擊(抽插)

所謂嘅衝擊係指前後移動,模仿插入式性行為嘅抽插動作,衝擊功能嘅性玩具通常都會具備埋震動功能,同樣可以調較速度同頻率。不過基於結構上嘅限制,呢類性玩具嘅抽插覆度相比陰莖/手指/其他身體部份抽插會比較少,使用嘅時候可以用人手輔助增加深度同刺激。



3️⃣ 吸啜/抽真空

呢類型性玩具嘅原理係透過吸啜/震動令身體部位係短時間內充血,從而達致高潮。先講男士用嘅自慰杯 (飛機杯),現時有唔同類型嘅飛機杯可以做到抽真空嘅效果,令飛機杯可以更加緊緻咁包覆住陰莖,增強快感✈️。至於點樣抽真空呢?唔同類型嘅抽真空飛機杯都有唔同嘅使用方法嘅,例如有啲係按壓飛機杯嘅兩側,有啲就係用手指覆蓋住飛機杯頂端嘅氣孔,最緊要都係睇返使用說明書!而女士方面,就有用嚟刺激陰蒂嘅吸啜震動器。陰蒂包含住約8000個神經末梢,係女性最敏感嘅部位 [1],男士龜頭嘅神經末稍其實只有陰蒂嘅一半。另外,陰蒂同陰莖一樣有海綿體,當受到刺激嘅時候同樣會因為海綿體充血膨脹而勃起,令陰蒂球突出 [2]。咁陰蒂吸啜器同一般嘅震動器有咩分別呢?主要就係在於吸啜器嘅刺激相對一般震動器溫柔,正如頭先所講陰蒂係非常敏感,如果刺激嘅力度太大容易造成疼痛、麻痹等不適感,而陰蒂吸啜器就係透過輕柔而細緻嘅吸啜同震動令陰蒂喺短時間內充血,從而達致陰蒂高潮⚡



4️⃣ 伴侶共享

有無諗過可以同伴侶一齊享受性玩具帶嚟嘅快感?宜家有唔少形形式式嘅伴侶共享性玩具,最典型嘅就係俗稱「C字型玩具」嘅伴侶震動器。 例如俾女性使用嘅時候就可以將震動器嘅一端放喺陰道內,另一端緊貼住陰蒂,喺進行插入式性行為嘅時候,陰道內嘅一端就可以同時刺激到陰道同陰莖,而另一端就可以刺激埋陰蒂,增加快感。但每個女仔嘅陰部外型都唔同,會唔會fit唔到個C字型架?唔洗擔心,大部份依類型嘅伴侶震動器都可以調較角度嘅👌🏻~ 而其他伴侶共享嘅性玩具嘅例子仲有陰莖震動環,喺進行插入式性行為嘅時候,將陰莖環配戴於陰莖根部,另一端緊貼女方嘅陰部/陰蒂,就可以同時震動雙方性器官。不過使用陰莖環要注意使用時限,因為陰莖環會減慢陰莖嘅血液循環,延長陰莖勃起嘅狀態,如果長時間持續使用嘅話,有機會因為血液循環唔暢通而引起令陰莖麻木,嚴重嘅話更加會影響陰莖嘅性功能⚠️。所以普遍嘅陰莖環都唔可以持續使用多過20分鐘,使用期間亦都要留意陰莖有無任何不適。另外,亦都有一啲伴侶共享嘅性玩具係有遙距功能嘅,即使二人分隔兩地都可以用電話APP遙控對方嘅性玩具,為對方帶嚟快感🔥💦



性行為嘅方式有好多種,所以性玩具嘅使用方式都係千變萬化嘅,大家可以按個人/伴侶需要去調節,配合唔同形式嘅性行為同性刺激。一個玩具可以有多個玩法,由你話事😎 揀咗適合自己嘅質料同功能之後,就到選擇潤滑劑嘅時候啦~ 下個post會同大家講解下唔同質料嘅性玩具要配撘邊種潤滑劑,亦都會同大家介紹一啲可以提升性玩具帶嚟嘅快感嘅選擇,大家記住唔好錯過嚟緊嘅post啦~


TEXT: ANA

GRAPHIC: KITTY & ANA


參考資料:

[1] Di Marino, V., & Lepidi, H. (2014). Anatomic study of the clitoris and the bulbo-clitoral organ (Vol. 91). Switzerland: Springer International Publishing.

[2] Mazloomdoost, D., & Pauls, R. N. (2015). A comprehensive review of the clitoris and its role in female sexual function. Sexual medicine reviews, 3(4), 245-263.

———————————————

糖不甩|性教育|網上性健康平台💛

對性/性別/關係...有疑問?想搵人傾下?

糖不甩討論區隨時ready答你問題!識揀,一定揀糖不甩!

Discuss.stickyricelove.com


#stickypedia #stickyricelove #糖不甩 #stickypediasextoys #stickypedia性玩具 #sextoys #性玩具 #自慰棒 #自慰器

#五大寶品 #缺一不可 

#sexeducationhk #性 #性教育 #gender #relationships #sex #sexpleasure #性歡愉 #hksex #hklove #hkboys #hkgirl


全力支持 SUPPORTED BY:

“累積學習”計劃

Accumulator Scheme

合作伙伴 Partners:

seshglobal.org

© 2020 Sticky Rice Love 糖不甩
此網誌及相關超連結內的內容純屬普遍意見,若就身體上的任何問題,敬請就個別意見,諮詢閣下的醫生。

The advice given in this platform and the related hyperlink is of a general nature only.  For specific advice on the medical conditions, please consult your medical doctor.

訂閱每月消息!