子宮頸抹片檢查係咩東東?
  • 糖不甩 Sticky Rice Love

子宮頸抹片檢查係咩東東?


好多人都認為婦科檢查係只有懷孕或者即將生小朋友嘅人先會去應診,加上檢查方法令人好難為情,所以好多時都會忽略左做婦科檢查的重要性。其實香港衛生署係有建議25歲以上有性行為嘅婦女應該每年定期做一次婦科檢查。


🌟咁究竟婦科檢查包括什麼項目呢? 常規嘅婦科檢查包括內診,檢查白帶,外陰檢查,陰道檢查,盆腔超聲波檢查和子宮頸抹片檢查。


🌟咁到底咩係子宮頸抹片檢查? 其實佢全名係「柏氏抹片檢查」,醫生可以透過抹片檢查,偵測到子宮頸癌症前的病變,從而再做更深入嘅檢查,作出適當嘅處理,避免不正常嘅細胞發展成癌細胞。一般醫生都會建議有性生活嘅女士至少一年檢查一次。但好多時女士們都會嫌檢查麻煩,擔心唔知醫生會點樣檢查或者怕尷尬而唔願意去做檢查。

其實抹片檢查只需要大概5分鐘就可以完成。檢查嘅過程,醫生會先將窺器放入陰道,去清楚確認子宮頸嘅位置,再透過窺器,用一根小木刮棒係你子宮頸嘅表面拎一些細胞樣本,再將樣本塗係玻璃薄片上,醫生就會拎走窺器,檢查就完成啦!而樣本亦會送去化驗室進行測試。


🌟過程會唔會痛或者唔舒服? 女士們一定會好擔心呢個問題,但其實檢查嘅時候只要放鬆心情就唔會感覺痛楚,醫生亦會係開始之前同你清晰解釋整個流程。如果真係覺得好緊張或者有唔舒服嘅感覺,可以試下調節呼吸,深呼吸去令自己盡量放鬆;又或者試下同醫生(或者護士)傾吓偈,好似平時打針咁,其實只要將注意力分散咗,不適感都自然會細啲。要記住緊張嘅時候其實身體肌肉都會跟住一齊收縮,反而會令過程嘅感覺更加大。

女士們可以享受性愛係一件值得開心嘅事,但作為一個愛錫自己嘅女士們,去確保自己身體健康都係好重要,由其係保護我地嘅子宮。有健康嘅子宮先可以安安心心咁繼續去享受性愛帶比我地嘅歡悅。


🌟最後,究竟邊到可以做子宮頸抹片檢查呢? 只要上衛生署網頁,就可以搜尋全香港邊到有提供服務。而香港嘅母嬰健康院有為25歲以上有過性行為嘅女士提供子宮頸檢查服務,費用都係210港幣以下。


相關網頁連結: 搜尋服務 http://www.cervicalscreening.gov.hk/tc_chi/cs/cs_where.php 子宮頸普查服務24小時預約及資訊熱線 http://www.fhs.gov.hk/…/mai…/woman_health/phone_booking.html


Text & Graphic: 吉蒂貓 (2017-18 Kissing You計劃義工)

全力支持 SUPPORTED BY:

“累積學習”計劃

Accumulator Scheme

合作伙伴 Partners:

seshglobal.org

訂閱每月消息!

© 2020 Sticky Rice Love 糖不甩
此網誌及相關超連結內的內容純屬普遍意見,若就身體上的任何問題,敬請就個別意見,諮詢閣下的醫生。

The advice given in this platform and the related hyperlink is of a general nature only.  For specific advice on the medical conditions, please consult your medical doctor.