【糖不甩x藥劑連線：女性健康專題 】
有樣嘢好想同大家講好耐好耐！我哋時不時都聽到有人講：「咁我日日洗陰道，咁咪唔會感染囉！」相信依個係女性性健康入便嘅其中一大謬誤！！！點解？等我地解釋一下啦！
【事情並唔係咁簡單！】
係正常情況下，陰道會偏弱酸性，依種弱酸性嘅環境會抑制病原體生長同繁殖，從而減低感染機會。另一方面，陰道係住左好多唔同嘅菌，唔好聽到菌就覺得好驚，依個菌群有佢嘅生態平衡，每日都維持緊女性陰道健康。所以，任何改變陰道酸鹼度同菌群嘅事情，其實都會增加陰道感染嘅機會。
用陰道灌洗液 (vaginal douche) 表面上能保持清潔，但其實會改變陰道本身嘅弱酸性環境同破壞自身存在嘅正常菌群，反而大大增加陰道受到感染嘅機會。服用抗生素同樣會殺死陰道中正常嘅細菌，比病原體有更大空間生長同繁殖，所以都會增加陰道感染的機會。另外，一些身體情況（如：懷孕、糖尿病）也會增加陰道感染的機會。但當然唔係叫大家有病都唔好食抗生素或者唔好懷孕，而係依啲時候要更留意自己生殖健康。
所以，如果醫生為你處方抗生素，記得要跟足指示完成整個療程，因為咁代表醫生判斷抗生素對你嘅好處遠大於壞處，避免因小失大。而如果你目前正懷孕或患有糖尿病，一旦發現有陰道感染嘅跡象，就要馬上問下你嘅家庭醫生或社區藥劑師！
Comentarios