《Stickypedia系列－性玩具：五大需知小知識(4)》
了解完性玩具嘅不同質地同功能，又認識咗要配合咩潤滑劑先玩得安心又安全，係時候講下購買嘅時候要注意嘅地方啦！好多人面對嘅第一個問題就係：想買性玩具但又覺得上鋪頭睇好尷尬😳
⏩其實宜家有唔少情趣用品店都有online shop，可以俾大家慢慢選購合適嘅性玩具，而送貨方面，好多時貨品嘅包裝都好私密，唔會標明係性玩具，亦都唔會睇到裡面裝住啲咩，望落去同一般網購貨品無分別，所以大家唔洗擔心收件嘅時候覺得好尷尬或者驚俾家人發現啊～ 不過其實宜家有唔少情趣用品店都旨在為顧客提供一個舒適、私密度高嘅選購空間，店員亦會大方地解答顧客嘅問題，所以大家都可以考慮到店鋪選購架，始終性玩具都真係要攞上手feel下先可以了解適唔適合自己嘅☺️
終於上到鋪頭／網站，但種類選擇太多，花多眼亂，無從入手點算好🧐？
⏩大家可以根據「質料大不同」同埋「功能知多少」兩個post嘅內容選擇咗自己喜歡/想嘗試嘅性玩具類型先，再喺選購嘅時候揀返嗰一個類型嘅入門級性玩具，例如如果你想試用震動按摩棒嘅話，就選擇當中比較幼身、小巧嘅按摩棒先，因為我哋身體都需要時間去適應性玩具帶黎嘅刺激，如果初次試用就選擇最大強度刺激嘅性玩具嘅話，反而可能會造成疼痛，而令我哋此後抗拒性玩具😣就好似我哋做運動嘅時候都要循序漸進，等身體適應咗個節奏同肌肉鍛煉得更強壯之後，再增加運動嘅強度，咁先可以避免受傷同埋讓我哋可以享受運動嘅過程💪🏻
⏩買性玩具同買野食一樣，都要選擇有信譽嘅店鋪，亦都要留意產地來源，如果唔係分分鐘會影響人身安全。大家喺online shop選購性玩具嘅時候，除左要留意產地來源同保養詳情之外，亦可以向店主查詢多啲有關玩具嘅質料👀因為好多時單憑圖片都好難了解玩具嘅確實質感，就好似矽膠玩具都有分軟身同較硬身咁，而網站亦未必有詳細嘅描述，所以購買前記住了解清楚先💭
⏩如果大家唔了解玩具嘅操作，都建議先向店員查詢，睇返網上嘅使用說明或者產品說明書，特別係電動嘅性玩具，記住要了解返係唔係整個玩具都係防水，以防使用嘅時候不慎觸電阿！另一樣要留意嘅就係電動類型嘅性玩具係有分充電式同入電芯嘅。充電式當然相對方便，但係用完之後記得要叉電，如果唔係下次用嘅時候就可能用用下無電，要等佢叉返滿電先可以繼續用🔌而入電芯嘅性玩具可能唔係100%防水，亦都相對重啲，但無電嘅時候只要換咗粒電芯就可以用，可以免卻等候充電嘅時間。所以大家選購嘅時候就記得睇埋佢係用邊種電池啦🔋
喺現今社會，性依然經常被塑造成一件獵奇、羞恥，甚至係禁忌嘅事，所以有時大家談論／接觸同性相關嘅事可能會感到尷尬，但我地好想鼓勵大家嘗試正面地對待性－每人都有享受性歡愉嘅權利，喜歡性、渴望性並唔係一件羞恥嘅事🥰 我地好喜歡將性比喻為食物🍡希望每一個人談論性都可以好似談論食物咁自然👅
最後，希望大家明白性玩具就好似衫褲咁，未試過係唔會知岩唔岩自己嘅身型，有時睇落去覺得好靚，但著咗上身先發現原來唔係想象中嘅模樣。所以如果買咗性玩具返去之後發現唔岩用嘅話係好正常嘅事黎，依個亦都係一個幫助你去了解自己身體嘅過程，因為你會從中知道自己唔同部份嘅性器官對刺激有咩反應，亦有機會意外地發現咗自己鍾意咩類型嘅刺激。性就係一個需要時間去探索、充滿住新奇同樂趣嘅體驗過程💭🌐
TEXT: ANA
GRAPHIC: ANA + KITTY
———————————————
Come talk to us!
糖不甩討論區有性治療師同義工答你問題！識揀，一定揀糖不甩！
Discuss.stickyricelove.com ——————————————— Come talk to us! 糖不甩討論區有性治療師同義工答你問題！識揀，一定揀糖不甩！ Discuss.stickyricelove.com