《Stickypedia系列－性玩具：五大需知小知識(5)》
嚟到《性玩具篇》嘅最後一個post，今次會同大家講下買咗性玩具返去之後可以點樣清潔同保養。知道大家近排都好勤力用消毒酒精清潔生活用品，但記住矽膠性玩具係唔可以用酒精消毒架！因為酒精會侵蝕矽膠，令到性玩具嘅表層有好多微細嘅窿窿，啲細菌就會積藏左喺入面，咁到使用性玩具嘅時候就好容易感染細菌而導致發炎🦠。大家可以喺使用前同後用清水🚿同梘液🧼清洗性玩具，之後再用不掉毛嘅毛巾或者紙巾抹乾。但係因為清水同梘液無抗菌嘅功能，所以最有效嘅方法係購買性玩具專用嘅抗菌清潔噴霧／清潔液🧴。依啲清潔用品不含酒精，唔會破壞性玩具表層之餘又可以做到消毒抗菌，而成份亦都相對適合人體，可以用於任何質料嘅玩具上，所以大家喺選購性玩具嘅時候可以睇埋性玩具嘅清潔用品啦～
另外，雖然基於衛生問題唔鼓勵同人共用性玩具，但如果伴侶間想共用性玩具嘅話🔗，都建議使用安全套，而且其中一方用完之後要徹底清洗性玩具，同埋換一個新嘅安全套先俾伴侶用。自用又想進一步保持性玩具衛生嘅話都可以使用安全套架。大家可以透過量度性玩具嘅尺寸去選購安全套，或者有一啲情趣用品店亦都有賣性玩具專用嘅安全套，不過記得乳膠安全套係唔可以同油性潤滑劑一齊用架🚫
至於點樣保存性玩具呢🛅？有部份性玩具係會附送防塵袋，咁大家用完清潔好同徹底抹乾性玩具之後，就可以將佢放入防塵袋，咁就可以避免性玩具嘅表面堆積灰塵或者細菌。如果性玩具本身無附送防塵袋嘅話，大家都可以喺情趣用品店度購買性玩具收納袋。不過因為唔係所有情趣用品店都有依類型嘅產品賣，所以大家可以喺唔同嘅情趣用品店嘅網站度搜尋下先🔎，通常都會喺「玩具清潔」嗰一個類別入面搵到，然後再比較下唔同店鋪嘅款式同價錢。而如果大家係慳家寶寶嘅話，都可以用密實袋保存性玩具架，最緊要係保持玩具衛生同乾爽🍃。另外，之前講過嘅潤滑劑、安全套同埋性玩具清潔液就記住要存放喺陰涼、乾爽嘅地方，避免被陽光直接照射到🌞，否則有機會影響到產品嘅品質架～
用唔用性玩具，點樣用性玩具都係個人選擇，就好似任何形式嘅性行為同性喜好咁，世間上無一套絕對正確」嘅方式。只要有共識、唔會傷害到其他人、你又鍾意嘅話就係無問題🥰！希望呢五大需知幫到大家更了解各種玩具嘅特性，可以選擇到適合自己嘅款式，用得更安心同享受💫。如果有其他關於性玩具嘅問題，歡迎留言或者PM我哋傾吓呀～
TEXT: ANA
GRAPHIC: ANA + KITTY
———————————————
Come talk to us!
糖不甩討論區有性治療師同義工答你問題！識揀，一定揀糖不甩！
Comments