top of page

潤滑劑配搭

作家相片: 糖不甩 Sticky Rice Love糖不甩 Sticky Rice Love

已更新:2020年9月8日

《Stickypedia系列-性玩具:五大需知小知識(3)》


潤滑劑同性玩具就好似調味料同食材咁,唔同嘅食材要配撘唔同嘅調味料,如果配撘得宜嘅話可以製成美味嘅食物,甚至提升食材本身嘅香味;但如果配撘錯咗嘅話,再好嘅食材都會變得唔好食。所以今次我會講下性玩具同潤滑劑嘅配撘,令大家可以安心享受性玩具🥰💦




1️⃣ 水性潤滑劑:

✅可配撘的性玩具質料: 矽膠、金屬、玻璃、水晶

水性潤滑劑可以配合嘅性玩具質料廣泛,亦都易於清洗,但女士購買嘅時候要留意返潤滑劑有無甘油(Glycerin)嘅成份,甘油有機會影響陰道嘅pH值,誘發細菌感染,造成陰道炎,所以本身陰道比較敏感嘅朋友仔就要小心選擇啦🥺~大家可以參閱我地之前嘅文章《有咩特別款嘅潤滑劑?》去了解多啲。另外,使用飛機杯亦要配撘返水性潤滑劑,因為矽性潤滑劑會破壞矽膠飛機杯嘅表層,而油性潤滑劑較難清洗,加上飛機杯內部嘅結構複雜,可能會因為清潔得唔徹底而令飛機杯積藏細菌,甚至發霉💀。不過其實市面上亦有飛機杯專用嘅潤滑劑,而且有唔同嘅質感(例如仿真分泌物質感、濃厚拉絲質感、啫喱感等等)俾大家選擇架~


2️⃣ 矽性潤滑劑:

✅可配撘的性玩具質料: 金屬、玻璃、水晶

矽性潤滑劑嘅潤滑度相對持久,唔會溶於水,所以特別適合缺少分泌嘅後庭用或者喺水入面使用。但要注意矽性潤滑劑係唔可以用喺矽膠性玩具上架! 因為好似上面咁講,矽性潤滑劑會侵蝕矽膠性玩具嘅表層,令到佢較快耗損同埋容易積藏細菌🦠。所以即使係後庭性玩具,如果係矽膠質料都要用返水性潤滑劑。另外,其實現時市面上亦都有水矽混合嘅潤滑劑,既可以好似水性潤滑劑咁方便清洗,但同時都具備矽性潤滑劑嘅持久潤滑效果,但購買嘅時候要留意返潤滑劑有無標明可以用喺矽膠性玩具上,或者可以向店員查詢,因為唔係所有水矽混合嘅潤滑劑都可以喺矽膠性玩具度嘅🙅🏻‍♀️


3️⃣ 油性潤滑劑:

✅可配撘的性玩具物料: 矽膠、金屬、玻璃、水晶

油性潤滑劑嘅潤滑度係最持久嘅,但同時都係最難清洗嘅,所以一般用水性或者矽性嘅潤滑劑已經足夠。除咗上面提到唔可以用矽性潤滑劑嘅矽膠性玩具,如果想鴛鴦戲水嘅時候用嘅話,就可以考慮使用唔溶於水嘅油性潤滑劑啦~ 不過因為油性潤滑劑唔容易分解,有機會引起陰道/肛門不適,或者因pH值唔相容引起發炎,所以選購嘅時候建議揀一啲成份天然同防過敏嘅油性潤滑劑。


4️⃣ 快感提升潤滑劑:

✅可配撘的性玩具物料: 矽膠、金屬、玻璃、水晶 (*視乎潤滑劑基底,即水性/油性/矽性)

潤滑劑除咗滋潤我哋嘅性器官之外,其實仲有可以提升快感嘅款式,無論係性愛或者使用性玩具嘅時候都可以用架~ 常見嘅快感提升潤滑劑有溫感/冰感潤滑劑、敏感度提升潤滑劑等等,比較特別嘅仲有可以模仿輕微電擊感嘅款式添⚡!佢哋嘅原理一般都係添加可以促進性器官血液循環(例如辣椒、薄荷等)嘅成份,增加性器官嘅敏感度或者產生暖感/冰感。開始使用依啲潤滑劑嘅時候,性器官可能會有輕微嘅刺痛感,但如果持續出現不適,例如強烈刺痛感或者痕癢,就要立即停用同埋清洗性器官啦🤕! **女士們記住唔好灌洗陰道,清洗外陰就足夠了** 視乎返身體嘅敏感度同個人喜好,呢啲產品每個人用起上嚟體會都可以唔同。試新產品嘅時候建議先用少份量,睇下身體反應如何,避免一嚟就落好多,如果唔鍾意就唔好啦🤫


相信大家睇完依幾個post之後都對於選購適合自己嘅性玩具有更多嘅了解,但係去邊度買好?點樣選購有品質保證嘅性玩具?下一個post就會為大家講解下「初次購買需知」,敬請期待🤩!


TEXT: ANA

GRAPHIC: ANA & KITTY

———————————————

糖不甩|性教育|網上性健康平台💛

對性/性別/關係...有疑問?想搵人傾下?

糖不甩討論區隨時ready答你問題!識揀,一定揀糖不甩!


474 次查看0 則留言

最新文章

查看全部

Comentarios


關於「糖不甩」

成立於2014年,糖不甩奮力為每個人提供一個開明、安全的空間來討論性。透過提供全面性教育,以朋輩主導的方向在網上平台推廣性健康,並就提倡性健康及全面性教育進行研究工作。糖不甩致力於香港建立一個包容的空間,鼓勵年輕人有能力與自身性情連結,並做出知情決定。

糖不甩是香港《稅務條例》第 88 條認可的慈善機構
(慈善機構檔案號碼 #91/12592)。

Sticky Rice Love Ltd. is a charitable Institutions under section 88 of the Inland Revenue Ordinance (IR File Number #91/12592).

訂閱每月消息!

恭喜你! 你已成功訂閱糖不甩!

© 2025 Sticky Rice Love 糖不甩
此網誌及相關超連結內的內容純屬普遍意見,若就身體上的任何問題,敬請就個別意見,諮詢閣下的醫生。

The advice given in this platform and the related hyperlink is of a general nature only.  For specific advice on the medical conditions, please consult your medical doctor.

bottom of page