有日有個廿幾歲仔入到診所左望右望…...
我問:先生，係咪登記睇醫生呀？
佢:呀…呀…呀…我想…買嘢…
我:買嘢？買乜嘢呀？
佢:嗰個…呀呀呀…套呀
我:套？
佢:要…半打呀
我:先生，我地呢度冇套賣…
佢:半打呀，六盒呀…
我:你去附近七仔惠康買啦
佢:呢度買有折呀…平好多呀…
我:我地係冇得買…
佢終於瞓醒，望住我:朋友又話有得買嘅！仲話係超薄！
我:你朋友講嘅應該係家計會或健康院
佢:附近有冇家計會呀？
我:冇呀，喺灣仔呀
佢:我唔經嗰頭，可唔可以訂購嚟呢度拎？
我:我地冇得咁訂…
佢:要去家計會買？
我:係呀
佢:佢會唔會問我買嚟做乜？
我:……
好欣賞佢去搵condom嘅行為，不過如果到到都有condom拎，仲邊會有人買condom？唔知點解個哥哥仔要咁問呢…如果係因為想搵免費dom dom..有D組織會派免費condom，好似係香港彩虹、再思社區健康組織 (C.H.O.I.C.E.)同A-Backup。Apple Store有個app叫「索FreeDom」，download咗之後可以申請拎免費condom，佢會寄比你。仲有啲domdom公司個網有得申請拎condom試用。另外，家計會都有得買domdom，35蚊就有一打，個到可以就咁買，有問題問都會有諮詢服務，得，得咗！係灣仔、馬頭涌、元朗、大圍、荃灣同黃大仙都有。依個世界上，有啲錢係唔慳得伽！如果係想攞嚟用..
用domdom可以預防性病同避孕，但要留意都唔係100%安全，消費者委員會做嘅調查就發現，每1,000個domdom就有1個有漏水問題，每1,000個就有10個破裂。喂喂喂！！ 咁點先冇咁易爆先？咁你就要用啱安全套啦！
１） 睇吓有冇過期先
２） 開個時搣開去，唔好用利器開，小心飾物同指甲整親domdom
３） Domdom個頭咪有粒嘢嘅，係用嚟儲著啲精液嘅，戴嘅時候要禁實個頭，擠啲空氣出嚟，咁佢就冇咁易裂伽啦
４） 之後一隻手hold住係頂部，一隻手推個套落到去最底就得伽啦 :)
５） 除個時係hold著domdom嘅底部推返出嚟
６） 包好先掉呀！但做之前，最緊要都係睇吓…
大家係咪真係想，要尊重大家嘅決定同感受 <3
學海無涯呀！施主！想知道更多性知識就繼續睇啦！