一直以嚟擔心意外懷孕嘅查詢有好多，而係最近我哋留意到有好多疑問關心女性有性行為後幾時會（可以）知道自己有否懷孕，同如果意外懷孕嘅話可以點處理。今日我哋就簡略地講解一下：
受精卵係子宮著床後體內嘅孕激素 hCG（人絨毛膜促性腺激素）會迅速上升，驗孕棒嘅原理就係透過檢測尿液中嘅hCG水平。一般嚟講，最快係性行為後7日已經可以用驗孕棒驗孕，會有初步嘅結果。因為受精卵著床大概需要11日，所以係性行為起計11日或之後再驗一次，結果就會更可信，而係預計月經嚟嘅日子去驗就會更加準確。至於點樣去做，大致上係將尿液完全沾濕測試區，然後等待一段時間，再睇結果。唔同牌子嘅步驟同等待嘅時間都可能有少少唔一樣，所以最緊要係跟返盒內嘅說明書去做。相信大家最緊張嘅都係結果，而要留意嘅係，必須要係見到有一條線先代表今次嘅測試有效，如果結果位置係完全無任何線條出現，咁呢個測試就係無效㗎啦。
一旦意外懷孕，可以選擇（1）繼續懷孕，自行／同伴侶一齊撫養（2）繼續懷孕，透過 母親的抉擇 為小孩尋找領養家長，（3）終止懷孕。
如果選擇終止懷孕，要係香港合法地進行手術，必須先經兩位醫生同意確認「繼續懷孕」對孕婦 或 嬰兒 嘅身心構成嘅威脅比「終止懷孕」大。 手術亦只能夠係香港法例「指定嘅醫院或診所」進行，包括家計會，並由註冊醫生負責執行。因為唔係所有醫院都可以進行，加上需要先經過詳細檢查同確保當事人適合進行終止程序，一般人都唔係可以即時進行到手術。而為咗保障孕婦嘅安全，香港衛生署指引提到除非為咗孕婦生命安全著想，否則必須係懷孕24週之內（大概5－6個月）進行終止，而家計會終止懷孕服務嘅標準就係懷孕10週之內。懷孕週期越長，手術嘅風險就越大。
終止懷孕可以透過藥物或者進行真空吸引手術進行。
藥物：使用會刺激子宮收縮嘅藥物令胚胎組織排出體外。因為毋須麻醉，對子宮傷害較細，風險亦相對較低。除咗藥物可能有副作用，另一個缺點係有機會未能完全引流，需要進行手術去完成流產。
真空吸引術：將胚胎組織吸出體外。過程需要局部或全身麻醉，雖然完全成功嘅機會率比較大，但對身體特別係子宮嘅傷害亦會比較大，術後需要多加休養身體。
人工流產有機會引起唔同嘅併發症，過程中亦可能出現唔同形式嘅情緒困擾，呢項決定並唔係坊間所想像咁輕易，但懷孕女性係絕對擁有自主權去做決定。每個人都有自己嘅故事，旁人永遠無法完全經歷或感受，因此，一旦孕婦決定終止懷孕，尊重、支持同理解比起質疑同批評，對當事人來講更重要，亦係友善嘅表現。
如果懷疑／已確認自己意外懷孕，除咗可以搵我哋，亦可以向母親的抉擇 Mother's Choice
或青躍 Teen's Key 尋求協助。
我們，一直都在。
參考資料：
香港家庭計劃指導會－終止懷孕
衛生署 家庭健康服務－人工流產